Samgöngur.is - Vefur um samgöngur á Íslandi

Elías Jónatansson

Jarðgöng til Bolungarvíkur eru að verða að veruleika. Á þriðjudaginn voru opnuð tilboð í rúmlega 5 km löng jarðgöng á milli Hnífsdals og Bolungarvíkur. Miðbær Ísafjarðar er þá í seilingarfjarlægð frá Bolungarvík, en þangað verður ferðatíminn innan við 10 mínútur í bíl, á öruggum vegi. Óshlíð sem liggur á milli Bolungarvíkur og Hnífsdals hefur um aldir verið Bolvíkingum farartálmi, en á leiðinni eru nokkrar ófærur sem erfitt var að fara um gangandi, áður en vegur var lagður um hlíðina. Það varð því mikil bylting í samgöngumálum Bolvíkinga þegar vegurinn var opnaður þann 12. október 1949. Vegurinn er þó langt frá því að vera hættulaus og hefur tekið sinn toll í ofanflóðum og er þar um að ræða hvoru tveggja snjóflóð og grjóthrun.

Frásagnir af slíku er m.a. að finna í nýútkomnu 2. bindi af sögu Bolungarvíkur. Þessar aðstæður hafa óneitanlega sett mark sitt á mannlíf í Bolungarvík og hafa ennfremur gert það að verkum að margir ferðast ekki á milli staða nema brýna nauðsyn beri til. Oft fylgir því ónotaleg tilfinning að vita af sínum nánustu ferðast um Hlíðina þegar veður eru válynd, en það er nokkuð sem foreldrar þurfa að sætta sig við á meðan börn þeirra sækja skóla til Ísafjarðar. Hlíðin hefur líka oft sett strik í félagslíf bæði bolvískra og ísfirskra unglinga sem hugðust sækja sömu skemmtun, íþróttamót eða aðra uppákomu í öðruhvoru byggðarlaginu.

Jarðgöngin eru önnur bylting í samgöngumálum Bolvíkinga, 60 árum á eftir hinni fyrri, og eru langstærsta framkvæmd sem ráðist hefur verið í á Vestfjörðum eftir að Vestfjarðagöngin voru opnuð. Þótt geta megi sér til um áhrif af slíkum samgöngubótum, þá eru þau engan veginn fyrirséð, en gert er ráð fyrir að umferð nálgist þúsund bíla á dag þegar göngin verða komin í notkun, sem er aukning um 50%. Þetta eitt og sér sýnir glöggt hver áhrifin væntanlega verða á mannlíf og búsetuskilyrði.

Þegar tilboð höfðu verið opnuð kom í ljós að lægsta tilboðið var næstum hálfum milljarði undir kostnaðaráætlun Vegagerðarinnar, sem auðvitað er sérlega ánægjulegt. Framkvæmdin er þó gríðarlega stór þar sem verktakakostnaður er tæpir 3,5 milljarðar, en reikna má með að annar kostnaður við hönnun og eftirlit verði nálægt hálfum milljarði. Það liggur því fyrir að framkvæmdin mun hafa mikil jákvæð áhrif á atvinnulíf á svæðinu næstu árin.

Sú jákvæða umræða og stuðningur sem framkvæmdin hefur fengið um allt land er okkur Bolvíkingum mikil hvatning. Þá er það okkur sérstakt gleðiefni að innan tíðar getum við sagt hvernig sem viðrar, að fært sé til Bolungarvíkur.

Elías Jónatansson, bæjarfulltrúi í Bolungarvík.

 

Grein af vefnum Víkari.is, www.vikari.is